Seirbheisean an eag-shiostaim - buannachdan nàdair

Read in English / Leugh ann am Beurla

Dè th’ ann an seirbheisean an eag-shiostaim?

Cha tigeadh daoine beò às aonais nàdair. Tha nàdar a’ toirt dhuinn uisge, adhar glan is biadh agus bun-stuthan airson leigheas, gnìomhachas is togalaichean. Cha bhiodh bàrr againn às aonais mheanbh-fhrìdean a nì poileanachadh agus nam pròiseasan bith-eòlach toinnte a bheir ùir dhuinn. Agus ma thadhlas sinn air pàircean is an dùthaich, a’ coinneachadh ri fiadh-bheatha, bheir sin piseach air ar deagh shunnd.

Chan fhaigheamaid na buannachdan seo, rud ris an canar seirbheisean an eag-shiostaim, gun àrainneachd shlàn fhallain.

Canar Seirbheisean an Eag-shiostaim ris na rudan (ris an canar calpa nàdarra) a chuireas eag-shiostaman ri deagh shunnd is càileachd beatha dhaoine air dòighean dìreach no neo-dhìreach.

’S e rudan gu math prataigeach a th’ annta, mar bhiadh is uisge no riaghlachadh na gnàth-shìde ach cuideachd rudan cultarach, mar lùghdachadh uallaich agus iomagain. Ged a tha eag-shiostaman a’ toirt dhuinn seirbheisean gun àireamh, ’s urrainn dhuinn an seòrsachadh ann an grunn roinnean: seirbheisean solair; seirbheisean riaghlachaidh; seirbheisean cultarach; agus roinn a tha beagan nas mì-shoilleie, seirbheisean taice.

Gheibh daoine buannachdan aig na seirbheisean eag-shiostaim seo an cruth tèarainteachd, bathair, stuthan, slàinte agus deagh shunnd.

Seirbheisean solair – seo bathar as urrainn dhut beantainn ris agus a bhuaineas daoine on àrainneachd mar bhiadh, fiodh, snàithleach, uisge agus connadh.

Seirbheisean riaghlachaidh – seo seirbheisean a tha a’ dol san eag-shiostam a bheir buannachdan dhuinn mar riaghlachadh na gnàth-shìde, smachd air tuiltean is criathradh an uisge.

Seirbheisean cultarach – seo buaidh a bhios aig nàdar air slàinte agus deagh shunnd dhaoine an cruth chur-seachadan is buannachdan foghlaim agus deagh bhuaidh air slàinte-inntinn agus cothrom ceanglaichean spioradail a bhrosnachadh.

Seirbheisean taice – chan obraicheadh eag-shiostaman às aonais nan seirbheisean taice, mar chearcall a’ bheathachaidh, cruthachadh ùire is bith-àrainnean airson bith-iomadachd agus ri linn sin, is iadsan bun-stèidh nan trì seirbheisean eile.

Tha bith-iomadachd aig cridhe nan seirbheisean seo uile.

Ma leanas sinn dòigh-obrach nan eag-shiostaman, is ciall dha seo gum feum sinn na ceanglaichean seo a thuigsinn agus seirbheisean an èiceo-shiostaim a thoirt fa-near is sinne a’ stiùireadh fearann, uisge ’s muir.

A’ cur suim ann an seirbheisean an eag-shiostaim

Tha sinn uile a’ faighinn bhuannachdan aig seirbheisean an eag-shiostaim, fiù mur eil fios againn orra. Tha suim aig mòran dhinn ann an seirbheisean an eag-shiostaim a chì sinn nar beatha làitheil, fiù mur eil sinn a’ tuigsinn an luaich a th’ annta.

Tha droch bhuaidh aig call nàdair air eaconamaidh, cultar is beatha làitheil a h-uile duine againn. Ma chosgas sinn airgead air nàdar – bith-iomadachd is eag-shiostaman, geò-iomadachd is cruthan-tìre os cionn uisge agus fodha – bheir sin piseach air càileachd nan seirbheisean seo agus glèidhidh e iad dha na ginealaichean seo romhainn.

Tha e doirbh luach eaconamach a chur air nàdar agus nan seirbheisean a bheir e dhuinn. Tha dà phìos rannsachaidh ann a sheall luach nàdair do dhaoine agus an cudrom eaconamach aige san fharsaingeachd:

• Measadh Nàiseanta Èiceo-shiostam na RA
• Eaconamachd nan Èiceo-shiostaman is na Bith-iomadachd

Ged a tha e doirbh àireamhan a chur ris, ma thèid againn air luach eaconamach a chur ri nàdar, bidh e nas fhasa mìneachadh carson a tha esan agus fuasglaidhean stèidhichte air nàdar cudrom dha ar sòisealtas is eaconamaidh agus a dhèanamh cinnteach gun gabhar a-staigh e nuair a bhios co-dhùnadh ri dhèanamh.

Mar eisimpleir:

• Tha luach co-dhiù £196 billean ann an calpa nàdarra na h-Alba, a’ cur taic ri 240,000 dreuchd.
• Tha seirbheisean poileanachaidh le meanbh-fhrìdean a’ cur luach mu thuaiream £43 millean gach bliadhna.
• Tha tràighean is boglaichean-sàile a’ dìon £13 billean de thogalaichean is bun-structar air cladach na h-Alba, an coimeas ri £5bn a tha fo dhìon bhallachan-mara togte.

Sheall Measadh Nàiseanta an Eag-shiostaim gun do chrìon buannachdan o nàdar san fharsaingeachd a-mach o na 1950an an cois atharraichean air àrainneachd nàdar na h-Alba.

Rinn na leanas droch bhuaidh air nàdar:

• cleachdadh an fhearainn;
• càileachd an adhair, an uisge is na h-ùire;
• àireamh nam beathaichean fiadhaich; agus
• a’ ghnàth-shìde is an aimsir

’S e atharrachadh na gnàth-shìde a th’ air cùlaibh mòran dhe na h-atharraichean seo agus tha droch bhuaidh eadar-nàiseanta agus ionadail aca air seirbheisean an eag-shiostaim is air na buannachdan a gheibh daoine aca. Feumaidh sinn co-obrachadh ri nàdar, seach na aghaidh, airson cùram a ghabhail dheth agus feumaidh sinn co-obrachadh air feadh nan roinnean uile airson buannachdan nàdair a chur gu làn-fheum agus teachd-shaoghal sheasmhach a thogail do dh’Alba.

Barrachd fiosrachaidh mu sheirbheisean an eag-shiostaim

Faigh barrachd fiosrachaidh mu bhuannachdan sòisealta agus eaconamach nàdair

Leugh an aithisg againn mun deuchainn a rinneadh air A’ cleachdadh fearann NàdarAlba mar chalpa nàdarra a tha airson tuairmeas a dhèanamh air luach eaconamach nan eag-shiostaman againn is na seirbheisean a bheir iad dhuinn.

Tha Clàr Maoinean a’ Chalpa Nàdarra a’ dèanamh sgrùdadh air uiread agus càileachd nam bith-àrainnean tìre a rèir na th’ annta de chothroman seirbheisean eag-shiostaim an-dràsta agus san àm ri teachd.