Tèarmann Nàdair Nàiseanta Chreag Eileachaidh - bileag an luchd-tadhail

Fàilte gu Tèarmann Nàdair Nàiseanta Chreag Eileachaidh

Tha Tèarmann Nàdair Nàiseanta Chreag Eileachaidh faisg air an Aghaidh Mhòir na mheasgachadh mìorbhaileach de choille-bheithe, blàrain fhosgailte agus lochan air an cuairteachadh le craobhan, ag èirigh gu mullach creagach le seallaidhean mìorbhaileach a-mach air Pàirc Nàiseanta a’ Mhonaidh Ruaidh. ’S e ‘àite creagach’ as ciall dha ainm an Tèarmainn. Tha Creag Eileachaidh air aonan de naoi de thèarmainn nàdair nàiseanta ann am Pàirc Nàiseanta a’ Mhonaidh Ruaidh agus timcheall oirre.

An aerial view of the old reservoir and birch woodland at Craigellachie

An rathad a Chreag Eileachaidh

Bhon Aghaidh Mhòir, gabh an t-slighe a’ dol gu Ostail na h-Òigridh, cùm ort seachad air pàirc nan carabhan agus rach a-steach don Tèarmann tron bhealach fon A9. Tha taighean-beaga is pàirceadh anns an Aghaidh Mhòir.

Craigellachie National Nature Reserve map — Enlarge this map

Na chì thu

Eòin-chreachaidh

Bho àm gu àm bidh càraid de sheabhagan-gorma a’ sìolachadh air a’ chreig, agus bidh eun-creachaidh nas motha, an clamhan, a’ cumail faire air an leathad cuideachd.

Dìtheanan

Chomharraicheadh còrr is 350 gnè lusan ann an Creag Eileachaidh, eadar lusan a tha titheach air dubhar leithid an t-sàil-chuach fhìnealta agus lus na gaoithe a bhios a’ tighinn fo bhlàth as t-earrach. Cùm sùil a-mach airson cairt-làir nan duilleagan buidhe mu na slighean coiseachd.

Beathaichean

Bidh losgainn, màgagan agus an dearcan-uisge spliutach uile air an tarraing leis a’ chuid fhliuch den Tèarmann, agus chithear dearcan-luachrach coitcheann is dall-chnuimhean bho àm gu àm gam blianadh fhèin air bruachan blàth. Ann am mìosan a’ gheamhraidh bidh am fiadh-ruadh san Tèarmann còmhla ris an earb-ruadh, dham bheil e càirdeach, agus chìthear iad air na ceuman-coiseachd tron latha an-dràsta is a-rithist.

Craobhan

Coltach ri iomadh coille-bheithe air a’ Ghàidhealtachd, bidh craobhan Chreag Eileachaidh a’ cinntinn ann an ùir bhochd, dheagh-thraoghte.

Cùm sùil a-mach airson craobhan-beithe fa leth a tha air tighinn gu inbhe is gu ìre. Tha coltas uasal orra, len cuid mheanglan fìnealta is dualan de dhuilleagan uaine. ’S e ‘Bean-uasal na Coille’ a chanar riutha.

Am measg nan craobh eile ann, tha an critheann, caorann, calltainn, fiodhagach, seileach agus giuthas-Albannach. Dh’fhaodadh gum faic thu preasan aitinn is roid an siud isan seo cuideachd.

View over the old reservoir at Craigellachie

Biastagan

Bidh na lochanan a’ tàladh tairbh-nathrach is cruinneagan, nam measg sgiabair na Gàidhealtachd agus tarbh-nathrach òr-fhàinneach. Tha Creag Eileachaidh ainmeil cuideachd airson leòmain leithid an t-sìneadair Rainich a tha cho titheach air na craobhan-beithe.

Annasan nan ràithean

An t-Earrach

Bidh ceilearachd bhinn air feadh na coille agus bidh grunnd na coille na bhrat dathach de dh’fhlùraichean-fiadhaich.

An Samhradh

Bidh dealanan-dè air uideal timcheall air an Tèarmann agus os cionn nan lochanan bidh tairbh-nathrach agus cruinneagan a’ sealg fhrìdeagan.

Am Foghar

Bidh a’ choille-bheithe eireachdail na dathan drùidheach an fhoghair agus cùm sùil a-mach airson na bhios ann de dh’fhungas. Tha cothrom ann gun cluinn thu langan na h-earba cuideachd.

An Geamhradh

’S e àm mìorbhaileach a th’ ann beanntan sneachdach a’ Mhonaidh Ruaidh fhaicinn bho àite-seallaidh an Tèarmainn.

Fiosrachadh feumail

Faodaidh coin dragh a chur air fiadh-bheatha. Cùm coin air iall ghoirid no fo smachd teann aig amannan cugallach agus gabh suim do shanasan sam bith a chì thu.

Common Lizard warming its self on a rock

Lean slighe

Tha pannal aig an t-slighe a-steach don Tèarmann air a bheil fiosrachadh mu cheithir slighean coiseachd. Tha iad uile air an comharrachadh le dathan is samhlaidhean. Bidh na slighean seo a’ fàs nas dùbhlanaiche mar as àirde a thèid thu ris an leathad.

Cùm sùil a-mach cuideachd do shanasan air a bheil fiosrachadh mu iùl-èisteachd mun Tèarmann. Faodar èisteachd ris air fòn-làimhe.